Ուկրաինացի պատգամավորներն այցելել են Ծիծեռնակաբերդի հուշահամալիր

Ուկրաինայի Գերագույն ռադայի ՀՀ-ի հետ միջխորհրդարանական կապերի խմբի ղեկավար Արտյոմ Դմիտրուկի գլխավորությամբ Գերագույն ռադայի պատգամավորները նոյեմբերի 15-ին այցելել են Ծիծեռնակաբերդի հուշահամալիր: Ուկրաինացի խորհրդարանականներին ուղեկցել են Ուկրաինայի հայերի միության փոխնախագահ Դավիթ Մկրտչյանը և Ուկրաինայում ՀՀ արտակարգ և լիազոր դեսպան Վլադիմիր Կարապետյանը։

Ինչպես հայտնում է AnalitikaUA.net-ը, Երևանում մեկնարկել են Ուկրաինայի հայերի միության միջոցառումները, որոնց մասնակցելու համար Հայաստան է ժամանել Ուկրաինայից ավելի քան 70 հյուր։ Պատվիրակների թվում են Ուկրաինայի տարածաշրջանային հայկական համայնքների ղեկավարներ, ազդեցիկ քաղաքական գործիչներ, Ուկրաինայի խորհրդարանի պատգամավորներ, հայտնի քաղաքագետներ և մեդիա փորձագետներ, խոշոր լրատվամիջոցների լրագրողներ, գիտնականներ, Ուկրաինայի հայ բժիշկների ասոցիացիայ բժիշկներ, հասարակական գործիչներ և մարզիկներ։

Ուկրաինայի հայերի միության ներկայացուցիչները նախօրեին բացեցին «Հայաստան ես եկել` ծառ տնկիր» ծրագիրը։ Ուկրաինայի պատվիրակության անդամները Երևանում 100 ծառ տնկեցին՝ սկիզբ դնելով նոր ծրագրին։

Այսօր Դեմիրճյանի անվան մարզահամալիրում ընթանում է Ուկրաինայի հայերի միության համաժողովը, նաև կկայանա սքեյթ պարկի բացումը՝ Ուկրաինայի հայերի միության նվերը Հայաստանի մայրաքաղաքին, սքեյթ պարկի բացման արարողության հյուրերի համար համերգ է նախատեսված` ուկրաինացի և հայ աստղերի մասնակցությամբ, տեղեկացնում է News.am-ը: