ՊԵՏԱԿԱՆ ՇԱՀԵՐԻ ՄԵՐՕՐՅԱ ՆՇԱՁՈՂԸ

Food Republic ռեստորանների սեփականատեր Արսեն Հովհաննիսյանը և «Հայաստանի պետական հետաքրքրությունների ֆոնդը» (ANIF) ծանուցել են Երևանում աշխարհահռչակ Hard Rock Cafe ապրանքանիշի բացման նախագծի մեկնարկի մասին, հաղորդում է ԱՌԿԱ-ն:

Ինչպես հացորդել են ANIF-ի մամլո ծառայությունից, օրերս Food Republic-ի հիմնադիր տնօրեն Արսեն Հովհաննիսյանը ֆրանչայզինգի պայմանագիր է ստորագրել Hard Rock International-ի հետ:

ANIF-ը մասնակցում է ծրագրին COVID-19-ի տնտեսական հետևանքների մեղմացման համար ստեղծված հակաճգնաժամային հիմնադրամի գործունեության շրջանակներում: ANIF-ը համաֆինանսավորում է նախագիծը՝ 48% մասնակցությամբ։

ԲԱՅՑ ԱՆՀՆԱՐ Է ԼՌԵԼ. բացարձակապես ոչինչ չունեմ Երևանում Hard Rock Cafe-ի բացման դեմ: Եթե ցանցը գործում է աշխարհի 50 երկրներում, եթե դա (սրճարանների ցանցը) ներառում է 300-ից ավելի օբյեկտ հարյուրավոր քաղաքներում, ապա ինչո՞ւ Հայաստանի մայրաքաղաքն էլ չհամալրի հասարակական սննդի աշխարհահռչակ ապրանքանիշի հաստատությունների տեղակայման վայրերի ցանկը: Այդ տեսանկյունից ինչո՞վ ենք պակաս Թբիլիսիից, Բաքվից, Ալմաթիից, Կրակովից կամ Բուդապեշտից։ Այլ հարց է, որ դժվար թե թվարկված քաղաքներում և աշխարհի տասնյակ երկրների հարյուրավոր այլ բնակավայրերում Hard Rock Cafe-ի առկայությունը բարձրացված լինի պետական շահերի մակարդակի։ Իսկ մեզ մոտ, ըստ էության, այդպես է։

Սկզբունքորեն, խոսքը ամենասովորական բիզնես-նախագծի մասին է, որը հիմնված է ֆրանչայզինգի՝ հանրահայտ ապրանքանիշի օգտագործման իրավունքի վարձակալության վրա։ Կոմերցիոն տեսանկյունից դա բավական տարածված պրակտիկա է, և բազմաթիվ գործարարներ կարող են պարծենալ նման նախագծերի իրականացման գործում իրենց հաջողություններով։ Սակայն «Հայաստանի պետական հետաքրքրությունների ֆոնդի» մասնակցությունն այս գործարքին, ընդ որում՝ այդչափ տպավորիչ չափով (48%), մեղմ ասած, տարօրինակ է թվում։ Ի վերջո, այդ ինչպե՞ս է Hard Rock Cafe-ն առնչվում Հայաստանի պետական հետաքրքրությունների հետ։

«Հայաստանի պետական հետաքրքրությունների ֆոնդի» պաշտոնական կայքում նշվում է. «Հայաստանի Պետական Հետաքրքրությունների Ֆոնդ» ՓԲԸ-ն (այսուհետ՝ ԱՆԻՖ) ՀՀ կառավարության ներքո գործող ընկերություն է, որի գործունեությունը միտված է խոշորագույն ներդրողների և գործընկերների հետ համատեղ լայնածավալ նախագծերի իրականացմանը: ԱՆԻՖ-ի նպատակն է լինել ակտիվ ներդրող և գործընկեր՝ խթանելով ներդրումները Հայաստանի տնտեսության կարևորագույն ոլորտներում»։ Համաձայնեք, Երևանում Hard Rock Cafe-ի բացումը մեծագույն ցանկության դեպքում անգամ դժվար թե հնարավոր է դասել լայնածավալ կամ ենթակառուցվածքային նախագծերի շարքին…

Հայաստանի գործող կառավարության օրոք մի տեսակ անհեթեթ կլինի փոքրիշատե հստակ գերակայություններ ակնկալել երկրի պետական շահերի ոլորտում։ Միամտություն կլինի կարծել, թե գործադիր իշխանության մեջ կա այն գիտակցումը, որ այսօր երկրի համար կարևորագույնը անվտանգության խնդիրն է, իսկ ներդրումային քաղաքականության ամենագլխավոր ուղղությունը պետք է համարվի ռազմարդյունաբերական համալիրը։ Սա պետական մտածողության ծայրահեղ բարձր նշաձող է այսօր որոշումներ կայացնողների համար։ Բայց, դատելով ամենից, նրանք չեն ձգում նույնիսկ ամենաստորին նշաձողի մակարդակին։

Մերկախոս չլինենք։ Բերենք ընդամենը մեկ օրինակ։ Մի քանի տարի առաջ Հայաստանի կառավարությունը նվեր ստացավ Ծաղկաձորի «Գոլդեն Փելիս» շքեղ հյուրանոցը։ Մի քանի անգամ փորձեց վաճառել, բայց գնորդներ չգտնվեցին։ Հետո օբյեկտը վերածեցին մեկուսարանի՝ կորոնավիրուսով վարակվածների համար։ Լինելով պետական սեփականություն՝ օբյեկտը տարեցտարի խարխլվում է։ Իսկ հիմա մի պարզ հարց. ի՞նչն է ավելի կարևոր Հայաստանի պետական շահերի տեսանկյունից. ներդրումները Ծաղկաձորի երբեմնի ծաղկուն «Գոլդեն Փելիսի» վերակենդանացման գործո՞ւմ, որն այսօր պատկանում է հայկական պետությանը, թե՞ ներդրումները Երևանում Hard Rock Cafe-ի ֆրանչայզինգային գործարքում: