Սի Ցզինպին. Չինաստանը մտադիր է խորացնել համագործակցությունը Ռուսաստանի հետ
ՄԱԿ-ի Անվտանգության խորհրդի մշտական անդամները պետք է համագործակցեն համավարակի դեմ պայքարի և գլոբալ խաղաղության պահպանման գործում։ Այս մասին ՌԴ նախագահ Վլադիմիր Պուտինի հետ տեսակապի միջոցով հանդիպմանը հայտարարել է Չինաստանի Ժողովրդական Հանրապետության նախագահ Սի Ցզինպինը, փոխանցում է ՏԱՍՍ-ը։
«Ստեղծված իրավիճակում ՄԱԿ-ի Անվտանգության խորհրդի հինգ մշտական անդամները պարտավոր են խորացնել համագործակցությունը համավարակի դեմ պայքարի, միջազգային խաղաղության և անվտանգության պահպանման, տնտեսական վերականգնմանն ուղղված գործողությունների համակարգման և միջազգային հանրության ակնկալիքներին ակտիվորեն արձագանքելու գործում»,- ասել է նա, փոխանցում է Չինաստանի արտգործնախարարությունը:
Բացի այդ, Չինաստանը մտադիր է խորացնել համագործակցությունը Ռուսաստանի հետ պատվաստանյութերի, դեղամիջոցների և թեստավորման համակարգերի մշակման հարցում։
«Մենք մտադիր ենք նաև ամրապնդել Ռուսաստանի հետ համագործակցությունն ու շփումները կորոնավիրուսի ախտորոշման թեստավորման համակարգերի, պատվաստանյութերի և դեղամիջոցների մշակման գործում»,- ասել է ՉԺՀ նախագահը, տեղեկացնում է News.am-ը։
Սի Ցզինպինը նաև կոչ է արել ուժեղացնել Չինաստանի և Ռուսաստանի միջև համագործակցությունը էներգիայի վերականգնվող և այլընտրանքային աղբյուրների, ինչպես նաև միջուկային էներգիայի ոլորտում։
«Ռուս-չինական էներգետիկ համագործակցությունն ամուր հիմքեր և շփման բազմաթիվ կետեր ունի։ Երկու կողմերը պետք է օգտագործեն ավանդաբար ուժեղ էներգետիկ փոխգործակցության պաշարը, այն լրացնեն համագործակցությամբ էներգիայի նոր աղբյուրների ոլորտում, խթանեն համագործակցությունը միջուկային էներգետիկայի ոլորտում, դիտարկեն էներգիայի վերականգնվող աղբյուրները և համագործակցության այլ ողղություններ»։