Վալոդյա Գրիգորյանին ոստիկանները թույլ տվեցին մտնել Փարաքարի համայնքապետարան
Արմավիրի մարզի Փարաքար համայնքի ղեկավարի թեկնածու, «Ապրելու երկիր» կուսակցության ներկայացուցիչ Վալոդյա Գրիգորյանին ոստիկանները թույլ տվեցին մտնել Փարաքարի համայնքապետարան։
Կուսակցության ներկայացուցիչ Մանե Թանդիլյանը հայտարարեց, որ ոստիկանությունը վերջապես թույլ է տվել Գրիգորյանին մտնել շենք։
Գրիգորյանը համակիրների և լրագրողների ուղեկցությամբ շրջեց համայնքապետարանում, զրուցեց աշխատակիցների հետ։
«Մեզ տեղեկացրին, որ կա դատական վեճ, որին մինչ այս պահը չենք ծանոթացել։ Ընտրություններից հետո մենք մյուս կողմերին համերաշխ աշխատելու կոչ ենք արել, քանի որ անկախ ամեն ինչից բոլոր երեք ուժերն էլ ընդգրծված են ավագանիի կազմում։ Ուզում ենք օր առաջ համատեղ ուժերով զարգացնել համայնքը»,-ասաց կուսակցության ներկայացուցիչ Մեսրոպ Առաքելյանը։
Նա մյուս ուժերին հրապարակավ կոչ արեց նստել մի սեղանի շուրջ ու լուծել առաջացած խնդիրները։ Առաքելյանը հույս հայտնեց, որ առաջիկա օրերին այս լարվածությունը կավարտվի, և օր առաջ կանցնեն աշխատանքի, տեղեկացնում է Sputnik Արմենիա-ն։
Հիշեցնենք, որ «Ապրելու երկիր» կուսակցությունը 21 հոգանոց ավագանիում ստացել է 10 մանդատ, և նրանք պնդում են, որ իրենց թեկնածուն՝ Վալոդյա Գրիգորյանը, 10 քվեով ընտրվել է համայնքի ղեկավար: Միաժամանակ «Դավիթ Մինասյան» դաշինքը պնդում է, որ ավագանու 11 քվեով համայնքապետ է ընտրվել Դավիթ Մինասյանը (նրան ձայն էին տվել նաև ավագանու ՔՊ-ական անդամները):
Նրանց պնդմամբ` համայնքի ղեկավար ընտրված երկու թեկնածուներն էլ այսօր ներկայացել էին պաշտոնը ստանձնելու։
Այնուհետև «Ապրելու երկիր» կուսակցության համակիրները ի նշան բողոքի փորձել էին փակել համայնքի ճանապարհը, նրանց և ոստիկանների միջև բախումներ էին սկսվել։
