Գագիկ ՄԻՆԱՍՅԱՆ. ԱԼԻԵՎԸ ԳԻՏԻ, ԹԵ ԻՆՉ ՆՎԱՍՏԱՑՈՒՄՆԵՐԻ ԵՆ ԵՆԹԱՐԿՎԵԼ ԻՆՔԸ ԵՎ ԻՐ ՀԱՅՐԸ ՔՈՉԱՐՅԱՆԻ և ՍԱՐԳՍՅԱՆԻ ՕՐՈՔ
Բաքվեցի բռնապետ Ալիևը գիտի, թե ինչ նվաստացումների են ենթարկվել ինքն ու իր հայրը Քոչարյանի ու Սերժ Սարգսյանի օրոք, գիտի, որ Հայաստանում իշխանության գլուխ կապիտուլյանտի հայտնվելն մեծ հաջողություն է իր համար։ Այս մասին հունվարի 14-ին լրագրողների հետ զրույցում ասաց Հայաստանի Հանրապետական կուսակցության ներկայացուցիչ, նախկին պատգամավոր Գագիկ Մինասյանը։
«Ալիևը գիտի, որ իրեն տրված ժամանակը սպառվում է, ուստի շտապում է՝ վախենալով, որ իշխանության կգան ազգային ուժեր, և Հայաստանը կկարողանա վերականգնել կորուստները»,- հավելեց նա։
Նրա խոսքով` Թուրքիայում և Ադրբեջանում տիրող հիստերիան հուշում է, որ հայկական կողմի պարտությունից հետո նրանց տրված ժամանակը մոտենում է ավարտին, և սկսվում է նոր փուլ, որի շրջանակներում նրանց դիրքորոշումները պետք է բխեն աշխարհաքաղաքական իրողություններից, այլ ոչ թե.ժ պատերազմի ելքը։ Դրանով է պայմանավորված Հայաստանի հետ պայմանագրեր կնքելու շտապողականությունը՝ արտաքին գործոնների ազդեցությունից խուսափելու համար։ Հայաստանի շուրջ և երկրի ներսում ստեղծված ծանր իրավիճակի համատեքստում, Երևանի համար սուբյեկտիվության կորստից հետո, ըստ Մինասյանի, վտանգավոր է շարունակել բանակցությունները Թուրքիայի և Ադրբեջանի հետ և իրադարձությունների սրընթաց զարգացման գնալ։ Հակառակը, Հայաստանին ձեռնտու են դանդաղ գործընթացները։
«Ընդհանուր առմամբ, այն երկրներին, որոնք գտնվում են Ռուսաստանի և Արևմուտքի միջև, դժվար ժամանակներ են սպասվում։ Մոսկվան համախմբում է իր դաշնակիցներին, ինչի դրսևորում էր ՀԱՊԿ-ի օպերացիան Ղազախստանում։ Արևմուտքը նույնն է անում։ ՆԱՏՕ-ի համար Թուրքիան շատ կարևոր է: Մյուս կողմից՝ Ռուսաստանը պատրաստվում է զարգացնել հարաբերությունները Անկարայի հետ՝ դաշինքի միասնությունը պառակտելու համար։ Թուրքական զորքերը վաղուց գտնվում են Ադրբեջանում։ Այսինքն՝ ՆԱՏՕ-ի զորքերը գտնվում են այն տարածքում, որը Ռուսաստանն իր ազդեցության գոտի է համարում: Թուրքիային, որպես ՆԱՏՕ-ի անդամ, դժվար կլինի Ռուսաստանի հետ այնպիսի սերտ համագործակցության մեջ լինել, ինչպիսին հիմա է։ Չնայած նրան, որ Թուրքիային այժմ շատ բան են ներում, նրա համար դժվար կլինի շարունակել «և-և»-ի քաղաքականությունը, այն ստիպված կլինի ընտրել»,- ասել է քաղաքական գործիչը։ Նա քիչ հավանական է համարել, որ ԵԱՀԿ Մինսկի խմբի համանախագահները կշարունակեն համագործակցությունը Մոսկվայի և Արևմուտքի միջև առկա լարվածության պայմաններում։