Բայդենը ՌԴ-ում դեսպանի պաշտոնում առաջարկել է Լին Թրեյսիի թեկնածությունը

Նախագահ Ջո Բայդենը մտադիր է Հայաստանում ԱՄՆ դեսպան Լին Թրեյսիին առաջադրել որպես Ռուսաստանի Դաշնությունում արտակարգ և լիազոր դեսպանի թեկնածու։ Այս մասին հայտնել է Սպիտակ տունը։

Նշվում է, որ Թրեյսին եղել է Պետդեպարտամենտի Եվրոպայի և Եվրասիայի հարցերով բյուրոյում Ռուսաստանի ավագ խորհրդական, իսկ մինչ այդ՝ Մոսկվայում ԱՄՆ դեսպանատան առաքելության ղեկավարի տեղակալ։

Նախկինում Թրեյսին աշխատել է Հարավային և Կենտրոնական Ասիայի գործերի բյուրոյում Կենտրոնական Ասիայի գծով պետքարտուղարի օգնական և Ազգային անվտանգության խորհրդում Կենտրոնական Ասիայի տնօրեն:

Թրեյսին ստացել է խորհրդային գիտությունների բակալավրի կոչում Ջորջիայի համալսարանում, իսկ իրավաբանական գիտությունների դոկտորի աստիճան՝ Ակրոնի համալսարանում։ Նա ազատ տիրապետում է ռուսերենին:

News.am