Բագրատյանն առաջարկում է դիտարկել եռակողմ հայտարարությունից ՀՀ դուրս գալու հնարավորությունը
Հայաստանը պետք է պաշտոնապես ճանաչի Արցախը. դա կարվի, թե ոչ՝ միևնույն է Ադրբեջանի հետ հարաբերությունները չեն բարելավվելու: Այս մասին այսօր խորհրդարանում տեղի ունեցած լսումների ժամանակ հայտարարեց ՀՀ նախկին վարչապետ Հրանտ Բագրատյանը։
Բագրատյանը ներկայացրեց չորս քայլ, որ Երևանը պետք է անի Հայաստանի և Արցախի շուրջ ստեղծված ճգնաժամից դուրս գալու համար: Առաջին հերթին, նրա խոսքով, պետք է հստակ դիրքորոշում ունենալ արտաքին քաղաքականության ուղենիշների հարցում և դադարեցնել Ռուսաստանից դեպի Արևմուտք և հակառակ ուղղությամբ շտապողականությունը։
«Գուցե պետք է դիտարկել նաև 2020 թվականի նոյեմբերի 9-ի եռակողմ հայտարարությունից Հայաստանի դուրս գալու հնարավորությունը»,- ասաց նա՝ մատնանշելով, որ Հայաստանին քիչ թե շատ ձեռնտու բոլոր դրույթները ժամանակավոր են և դե ֆակտո կորցնում են իրենց ուժը։ 5 տարի անց Բաքվի համար բարենպաստ դիրքերը մշտական են։
Բացի այդ, Բագրատյանն անհրաժեշտ է համարում, որ Հայաստանը ճանաչի Արցախը: Նա վստահ է, որ դրա պատճառով Ադրբեջանի հետ հարաբերությունները չեն վատթարանա, քանի որ Բաքուն արդեն նոր ագրեսիա է ծրագրում Հայաստանի դեմ։
«Պետք է իշխանափոխություն, մարդիկ, ովքեր ի վիճակի են ճիշտ գնահատել իրավիճակը և արդյունավետ քայլեր ձեռնարկել, պետք է գան իշխանության»,- ասաց Բագրատյանը՝ թվարկված քայլերից ամենակարևորը համարելով իշխանափոխությունը։
Verelq.am
