Տոկաևի մամուլի քարտուղար․ Ղազախստանը չի նախատեսում մտնել միութենական պետություն
Ղազախստանի մտադիր չէ և չի նախատեսում ստեղծել կամ մտնել որևէ միութենական պետության մեջ։ Այս մասին ասել է հանրապետության նախագահի մամուլի քարտուղար Ռուսլան Ժելդիբայը, տեղեկացրել է «ՌԻԱ Նովոստի»-ն։
Ղազախստանի նախագահ Կասիմ-Ժոմարտ Տոկաևը մայիսի 25-ին Մոսկվայում մասնակցել է Եվրասիական բարձրագույն տնտեսական խորհրդի լիագումար նիստին։ Պետության ղեկավարն այդ ժամանակ հայտարարել է Եվրասիական տնտեսական միության շրջանակում ինտեգրման տարբեր մակարդակների առկայության մասին՝ ուշադրություն դարձնելով Միութենական պետության միավորման մեջ Ռուսաստանի և Բելառուսի ներկայությանը։
«Ինչ վերաբերում է մեր երկրին, ապա Ղազախստանը մտադիր չէ և չի նախատեսում ստեղծել կամ մտնել որևէ միութենական պետության մեջ»,- նշել է Ժելդիբայը։
Նրա խոսքով՝ իսկապես, այսօր ԵԱՏՄ երկու մասնակիցներ՝ Ռուսաստանը և Բելառուսը, համագործակցության ավելի սերտ և ավելի բարձր մակարդակ են ցուցադրում։
«Սա ինքնատիպ նախադեպ է։ Ինչպես նշել է պետության ղեկավարը, ըստ էության, խոսքը մեկ ժողովրդի և պետության մասին է։ Եվ այս առումով շատ կարևոր է կիսել նախաձեռնություններն ինտեգրացիոն երկու նախագծերի շրջանակում, որոնք միանգամայն տարբեր նպատակներ ունեն»,- ասել է նա։
Ժելդիբայը նշել է, որ «պետության ղեկավարի հիմնական մեսիջն այն է, որ ինտեգրումը ԵԱՏՄ շրջանակում կարող է և պետք է ընթանա բացառապես տնտեսական ուղղությամբ»։
«Դրա շրջանակից դուրս գալը խախտում է կազմակերպության կանոնադրական փաստաթղթերի նպատակները, սկզբունքները և խնդիրները։ Ինչպես ընդգծել է նախագահը, տնտեսական ինտեգրումն ինքնանպատակ չէ, այլ տնտեսությունների զարգացման և մեր ժողովուրդների բարեկեցության բարձրացման միջոցներից մեկը։ Այսինքն՝ յուրաքանչյուր որոշում, որը կընդունվի միավորման շրջանակում, պետք է արդյունք բերի առանձին վերցրած յուրաքանչյուր մասնակցին և, նախ և առաջ, ԵԱՏՄ բոլոր պետտությունների քաղաքացիներին»,- ընդգծել է Տոկաևի մամուլի քարտուղարը։
News.am