ՉՈՐՐՈՐԴ ՓՈՒԼԸ
Ինչպե՞ս փլուզել պետությունը: Գործընթացը բաղկացած է 4 փուլից, որոնք վաղուց հայտնի են, շատերի կողմից լավ նկարագրված, քանզի ոչինչ նոր չէ այս արևի տակ: Բայց չի խանգարի հիշեցնել։ Հենց այսօր, երբ Խանքենդիում տեղի ունեցավ Ադրբեջանի ԶՈՒ զորահանդեսը։ Հենց Խանքենդիում, որովհետև Ստեփանակերտում այդպիսի շքերթն անհնար կլիներ ի բնե։
ԱՌԱՋԻՆ ՓՈՒԼԸ՝ ԵՐԲ ԴԵՌ ԻՇԽԱՆՈՒԹՅԱՆ ՂԵԿԻՆ ՉԵՍ: Այդ ժամանակ պետք է հնարավոր ամենուր, հնարավոր ամեն կերպ, կանգ չառնելով ոչ մի բանի առջև ստել ու զրպարտել սեփական պետությանը՝ զուգահեռաբար հավաքելով քո նմաններից բաղկացած թիմ։ Եվ չվախենալ, հասկանալ, որ քո պետությունն ունի թշնամիներ, որոնք ամեն կերպ կխրախուսեն քեզ, կաջակցեն և կօգնեն զավթել իշխանությունը՝ խաղաղության, արդարության, հավասարության, եղբայրության համար պայքարի կարգախոսների ներքո, խոստանալով ժողովրդին բաժանել հարուստների թալանածը: Անպայման կօգնեն, եթե վստահ լինեն, որ իշխանությունը վերցնելու համար դու և քո թիմը պատրաստ եք ցանկացած ստորության։
Երբ քեզ օգնեն զավթել իշխանությունը, սկսվում է երկրորդ փուլը։ Պարտադիր պայման է՝ նենգափոխել սեփական պետության անցյալը, ուրանալ այն։ Ասել և անդադար խոսել այն մասին, թե անցյալում ոչ մի լավ բան չի եղել. միայն թալան, կոռուպցիա, տեռոր: Չեն եղել հաղթանակներ։ Չեն եղել հերոսներ։ Չի եղել զրոյից ստեղծված բանակ։ Չի եղել զրոյից ստեղծված անվտանգության համակարգ։ Չի եղել զրոյից ստեղծված պետական կառավարման համակարգ։ Չի եղել խոսքի ազատություն։ Չի եղել զրոյից ստեղծված դատական համակարգ, զրոյից ստեղծված ֆինանսական համակարգ, չի եղել արդյունաբերություն, այլ եղել են միայն քաղաքական բանտարկյալներ և համատարած աղքատություն։ Անցյալի խեղաթյուրումը պետք է դառնա քո թիմի հիմնական ուղեգիծը, դավանանքը: Ոչ ոք իրավունք չունի լինել թիմիդ անդամ, եթե սեփական պետության անցյալի պախարակման դավանանքի հետևորդ չէ։
Վերջ տալով անցյալին՝ պետք է ձեռնամուխ լինել ներկային։ Երրորդ փուլը երկրի անվտանգության համակարգի փլուզումն է, ասելով, թե այն երբեք չի էլ եղել։ Խզել հարաբերությունները դաշնակիցների հետ՝ դավաճանելով հներին և ձեռք չբերելով հուսալի նորերի: Ճնշել ցանկացած այլախոհություն, իշխանության դեմ ուղղված ցանկացած շարժում: Ամեն պատրվակով փակել քաղաքական ընդդիմախոսներին ճաղերի հետևում, հիշելով, որ եթե կա մարդը և կա անհրաժեշտություն, ապա հոդվածն անպայման կգտնվի։
Զրպարտել սպաներին, բանակում վերածնել ոչ կանոնադրական հարաբերությունները, այնտեղ ստեղծել աննորմալ պայմաններ, որոնք կհանգեցնեն կորուստների։ Ստեղծել բանակի նկատմամբ անվստահության մթնոլորտ, որպեսզի ծնողներն ամեն կերպ ձգտեն "զերծ պահել" իրենց որդիներին բանակային ծառայությունից։ Վերջնական արդյունքում՝ զրպարտել ու ոչնչացնել բանակը: Դե, և որպես վերջաբան, իջեցնելով նշաձողը բացարձակ զրոյի, հանդիսավոր կերպով դավաճանել նրանց, ում երեսպաշտորեն անվանում ես "քույրեր և եղբայրներ": Նախապես նշանակելով "մեղավորների", որոնց վրա բարդելու ես այդ դավաճանության մեղքը։
Բայց այդ ամենը բավարար չէ։ Կա նաև չորրորդ, եզրափակիչ փուլը։ Որպեսզի պետականությունը դադարի գոյություն ունենալ, պետք է շատ ավելին։ Պետք է ուրանալ ոչ միայն անցյալն ու ներկան։ Պետք է նաև դառնալ ապագայի գերեզմանափոր, բացառել վերածննդի ցակացած հնարավորություն։ Դրա համար պետք է վերաշարադրել պատմության դասագրքերը և թշնամիների հետ կնքել այնպիսի պայմանագրեր, որոնք կվերածեն քո երկիրը նրանց հնազանդ խամաճիկի։ Ընդ որում, սովորականի պես, ստել համաքաղաքացիներին, թե դու ամեն ինչ անում ես իրենց անվտանգության և բարեկեցության աճի համար։ Նրանք կհավատան, քանի որ այլ ընտրություն դու նրանց այլևս չես թողել։