ՀԱՄԱՍ-Ը ՄԵՐԺՈՒՄ Է ՊԱՏԱՆԴՆԵՐԻՆ ԱԶԱՏ ԱՐՁԱԿԵԼՈՒ ԴԻՄԱՑ ԺԱՄԱՆԱԿԱՎՈՐ ԶԻՆԱԴԱԴԱՐ ՀԱՍՏԱՏԵԼՈՒ ԳՈՐԾԱՐՔԸ
Պաղեստինյան ՀԱՄԱՍ շարժումը մերժել է Գազայի հատվածում պատանդներին ազատ արձակելու նախնական առաջարկը, որը մշակվել է Փարիզում Եգիպտոսի, Իսրայելի, Կատարի և ԱՄՆ-ի մասնակցությամբ բանակցությունների ընթացքում։ Այս մասին հայտնում է The Jerusalem Post թերթը։
ՀԱՄԱՍ-ը և Պաղեստինի ազատագրման ժողովրդական ճակատը (PFLP) մերժում են շաբաթավերջին Փարիզում կնքված գործարքը, քանի որ այն չի ներառում մշտական զինադադար, նշում է պարբերականը։
Պարբերականը գրում է, որ պաղեստինյան կողմը պահանջում է իսրայելական զինվորականներից դադարեցնել հարձակումը Գազայի հատվածում և լքել տարածքը՝ նախքան գերիների փոխանակումը։
Նախկինում հաղորդվում էր, որ նախնական պայմանների համաձայն՝ պատանդների վերադարձի առաջին փուլը նախատեսում է վեցշաբաթյա դադար ռազմական գործողությունների անցկացման հարցում։ Այս դեպքում ՀԱՄԱՍ-ի կողմից պահվող յուրաքանչյուր քաղաքացիական անձ կփոխանակվի Իսրայելի բանտերում պահվող երեք պաղեստինցիների հետ։