2025-ին Հայաստանի 2 մարզի համար կստեղծվի առաջին ժամանակակից աղբավայրը. նախարար

ՀՀ Կոտայքի և Գեղարքունիքի մարզերի համար նախատեսված ժամանակակից աղբավայրը կգործի 2025 թվականին։ Այս մասին հայտարարեց Հայաստանի տարածքային կառավարման և ենթակառուցվածքների նախարար Դավիթ Խուդաթյանը` խորհրդարանում կառավարական ժամի ընթացքում պատասխանելով «Հայաստան» դաշինքի պատգամավոր Արման Ղազարյանի հարցին։

Պատգամավորը նշեց, որ իշխանությունները խոստացել են շինարարությունն ավարտել 2022 թվականին, սակայն աղբավայրը մինչ օրս չի գործում։

Խուդաթյանն ի պատասխան ասաց, որ աղբավայրի շինարարությունն արդեն ավարտվել է, ներկրվել են աղբատար մեքենաներ, որոնք այժմ գրանցման փուլում են: 4-5 ամիս անց դրանք կսկսեն աշխատել։

Նրա խոսքով՝ նախարարությունը քննարկում է ժամանակակից խոշոր աղբավայրերի կառուցման հնարավորությունը։ Արդյունքում հանրապետությունում նախատեսվում է թողնել 4-5 աղբավայր, իսկ մնացածը` փակել։

Հիշեցնենք, որ աղբավայրի բացման նախագիծը սկսվել էր դեռևս 2019 թվականին, սակայն ձգձգվել էր 6 տարով, թեև շինարարության շատ մեծ ծավալ չէր ենթադրում: Ծրագիրն իրականացվում է Վերակառուցման և զարգացման եվրոպական բանկի վարկով, նախագծի սկզբնական արժեքը կազմել է 11 մլն եվրո։

Sputnik Արմենիա