Փաստաբանը հայտարարել է Գյումրիում ձերբակալված 8 ընդդիմադիրներից մեկին ազատ արձակելու մասին
Հակակոռուպցիոն դատարանը մերժել է ընդդիմադիր Մարտուն Գրիգորյանի գլխավորած «Մեր քաղաքը» դաշինքի շտաբի անդամ Սուրեն Գասպարյանի նկատմամբ վարչական հսկողություն կիրառելու միջնորդությունը, հայտնել է փաստաբան Արսեն Բաբայանը։
Վարչական հսկողություն կիրառելու մասին միջնորդությունը ներկայացրել են քննչական վարչության քննիչները։ Գասպարյանն ազատ է արձակվել նիստերի դահլիճից, ասվում է հաղորդագրության մեջ։
«Սա առաջին հաղթանակն է»,- գրել է փաստաբանը։ Դատարանում դաշինքի անդամին պաշտպանում էր «Հինգ իրավապաշտպանների» նախաձեռնության անդամ Սերգեյ Հարությունյանը, տեղեկացրել է Բաբայանը։
Բաբայանը նաև մեղադրել է իրավապահներին, որ մտադիր են խոչընդոտել Գյումրիի քաղաքապետի ընդդիմադիր թեկնածուներին արդյունավետորեն մասնակցել ընտրություններին։ Նրա խոսքով, ընտրությունների օրը փորձում են սահմանափակել ավագանու թեկնածուների և «Մեր քաղաքը» դաշինքի մյուս անդամների քաղաքական իրավունքները։
«Փորձում են սահմանափակել ընտրության օրը ավագանու թեկնածուների և դաշինքի այլ անդամների քաղաքական իրավունքները»,- շեշտել է նա:
Գյումրիում մարտի 27-ին ընտրակաշառք տալու, ստանալու, ընտրության ժամանակ բարեգործության արգելքը խախտելու մեղադրանքներով 8 անձ էր ձերբակալվել։
Փաստաբան Արսեն Բաբայանը հայտնել էր, որ ձերբակալվել են Գյումրու քաղաքապետի թեկնածու Մարտուն Գրիգորյանի հայրն ու որդին, ավագանու թեկնածուներից մի կին ու նախընտրական շտաբի աշխատակիցներից երիտասարդ տղա։ Գրիգորյանի որդին, Կարեն Գրիգորյանը, ավագանու անդամի թեկնածու է:
Այսօր ավելի վաղ ՀԿԿ-ից Armenia Today-ին հայտնել էին, որ Գյումրիում խուզարկությունների արդյունքում կան ձերբակալվածներ քաղաքապետի արտահերթ ընտրություններին մասնակցող «Մայր Հայաստան» և «Մեր քաղաքը» դաշինքներից։
Մարտի 27-ին «Մայր Հայաստան» և «Մեր քաղաքը» դաշինքների ներկայացուցիչները հայտնել էին նախընտրական շտաբերում և իրենց անդամների, համակիրների բնակարաններում իրականացվող խուզարկությունների և քննչական գործողությունների մասին։ Հակակոռուպցիոն կոմիտեն տեղեկացրել էր, որ քրեական վարույթներ են նախաձեռնվել։ «Մայր Հայաստանից» տեղեկացրել էին, որ Էմմա Գրիգորյանին տարել են ոստիկանություն։ Մարտուն Գրիգորյանը, որի նախընտրական շտաբում և տանը նույնպես քննչական գործողություններ էին, հայտնել էր «Իրազեկ քաղաքացիների միավորում» ՀԿ ղեկավար Դանիել Իոաննիսյանի հաղորդման հիման վրա հոր և որդու նկատմամբ քրեական գործեր հարուցելու մասին։
Մարտի 30-ին կայանալիք Գյումրու ավագանու արտահերթ ընտրություններին մասնակցում է 9 քաղաքական ուժ, կա քաղաքապետի 9 թեկնածու։ Նրանք են՝ ռեժիսոր և պրոդյուսեր Ռուբեն Մխիթարյանը, «Պատիվ ունեմ» խմբակցության անկուսակցական պատգամավոր Մարտուն Գրիգորյանը, «Մայր Հայաստան» դաշինքի թեկնածու Կարեն Սիմոնյանը, նախկին քաղաքապետ Վարդան Ղուկասյանը, «Եվրադաշինք» կուսակցությունների դաշինքից Լևոն Բարսեղյանը, «Քաղաքացիական պայմանագիր» կուսակցությունից՝ Սարիկ Մինասյանը, «Դեմոկարտական այլընտրանք» կուսակցությունից՝ Արտյոմ Ղարաղազարյանը, «Հայաստանի աշխատավորական սոցիալիստական» կուսակցությունից՝ Արտյոմ Թումանյանը և «Ապրելու երկիր» կուսակցությունից՝ Կարեն Մալխասյանը։
Armenia Today