Տարոն Մարգարյանին մեղադրանք է առաջադրվել

ՀՀ Ազգային ժողովի «Պատիվ ունեմ» խմբակցության պատգամավոր, Երևանի նախկին քաղաքապետ Տարոն Մարգարյանին մեղադրանք է առաջադրվել: Տեղեկությունը Sputnik Արմենիային հայտնեցին ՀՀ գլխավոր դատախազությունից։

«Հսկող դատախազի կողմից հանրային քրեական հետապնդում հարուցելու որոշում է կայացվել, խափանման միջոց է ընտրվել բացակայելու արգելքը»,- նշեցին դատախազությունից։

Հիշեցնենք` ՀՀ գլխավոր դատախազ Աննա Վարդապետյանը մարտի 26-ին Ազգային ժողով էր գնացել պատգամավորներ Հովիկ Աղազարյանին և Տարոն Մարգարյանին անձեռնմխելիությունից զրկելու վերաբերյալ միջնորդագրեր ներկայացնելու համար։ Մարտի 27-ին ԱԺ–ն համաձայնություն տվեց ՀՀ գլխավոր դատախազի միջնորդությանը (67 կողմ՝ Տարոն Մարգարյանին, 65 կողմ, 2 դեմ՝ Հովիկ Աղազարյանին)։

Երևանի նախկին քաղաքապետին առնչվող քրեական գործը վերաբերում է 2 դպրոցի և 1 մանկապարտեզի տարածքները ապօրինաբար օտարելուն, պաշտոնեական դիրքը չարաշահելուն և փողերի լվացմանը։