ԱՄՆ պետդեպարտամենտը հայտարարել է USAID-ը լուծարելու մասին

ԱՄՆ պետդեպարտամենտը հանդես է եկել հայտարարությամբ, որում հայտնել է Միջազգային զարգացման գործակալության (USAID) լուծարման մասին։

Հայտարարության համաձայն՝ պետդեպարտամենտը և USAID-ը Կոնգրեսին ծանուցել են վերակազմավորում իրականացնելու իրենց մտադրության մասին, որը մինչև 2025թ. հուլիսի 1-ը կփոխանցի USAID որոշ գործառույթներ պետդեպարտամենտին և կդադարեցնի գործակալության այլ գործառույթները, որոնք «չեն համապատասխանում Միացյալ Նահանգների վարչակազմի առաջնահերթություններին»:

«Ճիշտ ցուցաբերված օտարերկրյա օգնությունը կարող է առաջ տանել մեր ազգային շահերը, պաշտպանել մեր սահմանները և ամրապնդել գործընկերությունը հիմնական դաշնակիցների հետ: Ցավոք, USAID-ը վաղուց շեղվել է իր սկզբնական առաքելությունից, ինչի հետևանքով արդյունքները չափազանց փոքր էին, իսկ ծախսերը՝ չափազանց բարձր:

Նախագահ Թրամփի շնորհիվ այս առումով անպատասխանատու դարաշրջանն ավարտվեց: Մենք կվերակողմնորոշենք մեր արտաքին աջակցության ծրագրերը՝ ուղղակիորեն համապատասխանեցնելով այն ամենին, ինչը լավագույնն է Միացյալ Նահանգների և մեր քաղաքացիների համար:

Մենք շարունակում ենք կյանքեր փրկելու կարևորագույն ծրագրերը և ռազմավարական ներդրումներ կատարել, որոնք ամրապնդում են մեր գործընկերներին և մեր սեփական երկիրը: Սա ամերիկացի ժողովրդին տրված և կատարված հերթական խոստումն է»,- նշվել է ԱՄՆ պետդեպարտամենտի հայտարարությունում:

News.am