Պեկինն աջակցում է ՌԴ–ի նախաձեռնությանը. ԱԳՆ–ն` Իրանի միջուկային խնդրի մասին
Չինաստանն աջակցություն է հայտնում Իրանի հետ միջուկային խնդրի շուրջ եռակողմ խորհրդակցություններ անցկացնելու ռուսական նախաձեռնությանը։ Ինչպես տեղեկացնում է ՌԻԱ Նովոստին, այսօր կայացած ճեպազրույցում այս մասին հայտարարել է Չինաստանի ԱԳՆ պաշտոնական ներկայացուցիչ Լին Ցզյանը։
Նա նշել է, որ Պեկինը ողջունում է Մոսկվայի ջանքերը՝ ուղղված Իրանի միջուկային խնդրի քաղաքական և դիվանագիտական լուծմանը։
«Մենք աջակցում ենք Ռուսաստանի կողմից փորձագիտական մակարդակով խորհրդակցությունների անցկացմանը և նրա ներդրմանը խաղաղ կարգավորման գործում»,– նշել է դիվանագետը։
Ինչպես ՌԻԱ Նովոստիին հայտնել է ՌԴ ԱԳՆ պաշտոնական ներկայացուցիչ Մարիա Զախարովան, Ռուսաստանի, Չինաստանի և Իրանի միջև խորհրդակցություններ տեղի կունենան ապրիլի 8-ին Մոսկվայում։ ՌԴ–ում Իրանի դեսպան Քազեմ Ջալալին հաստատել է, որ բանակցությունները տեղի կունենան փորձագիտական մակարդակով։
Նախաձեռնությունն անցկացվում է ԱՄՆ նախագահ Դոնալդ Թրամփի հայտարարությունների ֆոնին, որը ևս մեկ անգամ հայտնել է Թեհրանի հետ նոր միջուկային գործարքի հասնելու ցանկության մասին` կա՛մ բանակցությունների միջոցով, կա՛մ, ինչպես ինքն է ասում, «աննախադեպ ռմբակոծությունների ճանապարհով»:
Չինաստանը պնդում է, որ Իրանի միջուկային խնդրի լուծման միակ ճիշտ ճանապարհը դիվանագիտությունն է։ Ավելի վաղ՝ մարտի կեսերին, ՌԴ-ն, Չինաստանը և Իրանը Պեկինում նման բանակցություններ արդեն անցկացրել են փոխարտգործնախարարների մակարդակով։
Զուգահեռաբար Իրանը շարունակում է երկխոսությունը Գործողությունների համատեղ համապարփակ ծրագրի մյուս մասնակիցների՝ Մեծ Բրիտանիայի, Ֆրանսիայի և Գերմանիայի հետ։ «Եվրոպական եռյակի» հետ հանդիպումները տեղի են ունեցել փետրվարին և մարտի վերջին։
Sputnik Արմենիա