Քաղաքացուն ուզում են «տուգանքի մատերիալ» դարձնել. բողոքի ակցիա ԱԺ-ի մոտ
Երևանի ավագանու «Մայր Հայաստան» խմբակցության անդամները բողքի ակցիա են իրականացնում ԱԺ շենքի մոտ` պահանջելով չեղարկել տրանսպորտի ուղեվարձը չվճարելու դեպքում վարչական տույժ սահմանելու վերաբերյալ օրինագիծը։
Նշենք, որ այդ օրինագիծն այսօր կքննարկվի Ազգային ժողովի լիագումար նիստում։
Նախագծով առաջարկվում է ներհամայնքային կանոնավոր փոխադրումների կազմակերպման համար վճարները նույնպես սահմանել որպես տեղական վճար։ Ինչպես նաև առաջարկվում է սահմանել վարչական տուգանք առանց վճարման ծառայությունից օգտվող անձանց համար։ Առաջարկվում է ներդնել նշված զանցանքների կանխարգելման և բացահայտման համար մեխանիզմներ:
«Քաղաքացուն ուզում են «տուգանքի մատերիալ» դարձնել։ Մենք պայքարում են այն օրինագծի դեմ, որով տուգանվելու են տրանսպորտի թանկացման դեմ բողոքող և չվճարող քաղաքացիները»,–ասաց Երևանի ավագանու «Մայր Հայաստան» խմբակցության անդամ Գևորգ Ստեփանյանը։
Նշենք, որ ըստ նախագծի` այն քաղաքացիները, որոնք չեն վճարում տրանսպորտից օգտվելիս, տուգանվելու են 10000 դրամի չափով, իսկ նրանք, որոնք օգտվելու են, ենթադրենք, իրենց ընտանիքի մեկ այլ անդամին տրված արտոնությունների փաթեթից, տուգանվելու են 15000 դրամի չափով։
Տեղական վճարի գանձման (վճարման) նկատմամբ հսկողության իրականացման նպատակով լիազորված անձինք կարող են օգտագործել տեխնիկական միջոցներ, սարքավորումներ, այդ թվում՝ տեսանկարահանել, լուսանկարահանել, ձայնագրել, որոնք կարող են հիմք հանդիսանալ ենթադրյալ վարչական իրավախախտում կատարած անձանց ինքնությունը պարզելու կամ նույնականացում կատարելու համար:
Ուղևորները պարտավոր են տրանսպորտային միջոցը նստելուց անմիջապես հետո, բայց ոչ ուշ քան մեկ րոպեի ընթացքում, վճարում կատարել և մինչև ուղևորության ավարտը իրենց մոտ պահպանել վավերացված կրիչը։ Վճարման փաստը հաստատող ցանկացած միջոց պետք է ներկայացնել հսկողություն իրականացնող անձին, եթե դրա կարիքը լինի։ Վճարման փաստը չներկայացնելու բացասական հետևանքները կրում է ուղևորը: Նշված հանգամանքը կարող է հիմք հանդիսանալ ուղևորին վարչական պատասխանատվության ենթարկելու համար:
Լիազորված անձինք իրավունք ունեն տեղական վճարի վճարման միջոց չունեցող անձին շարժական տեսաձայնագրող կամ լուսանկարահանող տեխնիկական միջոցների օգտագործմամբ, այդ թվում՝ դիմապատկերով նույնականացնելու նպատակով բնակչության պետական ռեգիստրից ստանալ տեղեկատվություն և սույն մասում նշված անձանց կողմից նույնականացումից հրաժարվելու դեպքում դիմել ոստիկանություն։
Sputnik Արմենիա