«ԿԱՌԱՋԱՆԱ ԿԱԶՄԱԿԵՐՊՎԱԾ ԴԻՄԱԴՐՈՒԹՅՈՒՆ»,-

Երկակի չափանիշներ

Այն մարդկանց ճնշող մեծամասնությունը, որոնք 2016թ. հուլիսի 17-ին հարձակվեցին ՊՊԾ գնդի վրա, ինչի արդյունքում սպանվեցին երեք ոստիկաններ, այսօր ազատության մեջ են, իսկ իջևանցիները ձերբակալված են այն բանի համար, որ ընդհարվել են ոստիկանների հետ։ Նրանց, ովքեր 2008թ. մարտի 1-ին հրկիզող խառնուրդով շշեր էին նետում ոստիկանների վրա և ծեծում նրանց, ներկայիս իշխանությունն անվանում է խաղաղ ցուցարարներ, իսկ իջևանցիներին ձերբակալել են այն բանի համար, որ նրանք վիրավորել են 12 ոստիկանների։ Իր հրապարակային ելույթներից մեկում այս երկակի չափանիշները մատնանշեց ՀՅԴ խմբակցության նախկին պատգամավոր Աղվան ՎԱՐԴԱՆՅԱՆԸ։

Նա հիշեցրեց, որ 2018թ. առաջին երեք ամիսների արդյունքներով Հայաստանը դինամիկ զարգացող պետություն էր, որը ղեկավարում էին գրագետ և լավատեղյակ մարդիկ։ Ներկայումս, նրա գնահատմամբ, պետության կառավարման համակարգը չի գործում, և Հայաստանն արդեն դադարել է գոյություն ունենալ որպես իրավական պետություն, քանզի երկրում արդարադատություն չի իրականացվում։

Վարդանյանի խոսքերով, հասարակությունն արդեն փոխել է վերաբերմունքն իշխանության նկատմամբ, ինչի հետևանքով Փաշինյանը մարդկանց հետ հանդիպում է թիկնազորով շրջապատված, նա դադարել է ժողովրդական վարչապետ լինելուց։ Հարձակումները ՍԴ նախագահ Հրայր Թովմասյանի դեմ, Բարձրագույն դատական խորհրդի հետ կապված իրավիճակը, դատավոր Դավիթ Գրիգորյանի ծառայողական աշխատասենյակի խուզարկումը և իշխանության այլ գործողությունները, Վարդանյանի կարծիքով, շատ շուտով կմնան անցյալի գրկում։ «Մենք հիշելու ենք այս օրերն ու ամաչելու ենք մեր կյանքի այս փուլի համար»,- ընդգծեց նա։ Վարդանյանը համոզմունք հայտնեց, որ «տեսանելի հեռանկարում կառաջանա կազմակերպված դիմադրություն իշխանությանը»։

Անկախ քաղաքականության 2 օրինակ

Ներկյիս ղեկավարների այն հայտարարություններին, թե ի տարբերություն նախկին իշխանության՝ իրենք կառուցում են անկախ պետություն, Վարդանյանը հակադրեց 2 դրվագ, որոնք տեղի են ունեցել երկրորդ նախագահի կառավարման տարիներին։

Առաջինը վերաբերում էր նրան, թե ինչպես էր Ռոբերտ Քոչարյանը հասնում գազի գնի իջեցման։ Դա տեղի ունեցավ Սոչիում Պուտինի հետ հանդիպման ժամանակ։ Բանակցությունները երկար ձգվեցին, ռուսաստանյան կողմը չէր ցանկանում զիջումների գնալ։ Եկավ ճաշի ժամը։ Պատվիրակություններին սեղանի շուրջ նստեցրին դեմ հանդիման։ Մատուցեցին առաջին կերակրատեսակը, ռուսաստանյան պատվիրակությունը սկսեց ուտել, իսկ հայկականը, հետևելով Քոչարյանի օրինակին, ձեռք չտվեց սեղանի սպասքին։ Նույն պատմությունը կրկնվեց երկրորդ և երրորդ կերակրատեսակների մատուցումից հետո։ Հասկանալով, որ բանակիցները զիջումների չեն գնում, Քոչարյանը ելավ սեղանի մոտից և գնաց դեպի ելքը։ Այդ պահին նրան դիմեց ՌԴ արտգործնախարար Լավրովը։ Կոնսենսուսը ձեռք բերվեց։

Երկրորդ դրվագը վերաբերում էր հայ-իրանական գազամուղի բացմանը։ Քոչարյանի Մեղրի մեկնելուց երկու օր առաջ Երևան ժամանեց ամերիկյան բարձրաստիճան պաշտոնյա, որը հատարարեց, թե իր ղեկավարությունն աննպատակահարմար է համարում Քոչարյանի հանդիպումը Իրանի առաջնորդի հետ։ Քոչարյանն ի պատասխան հիշեցրեց, որ խոսքը ԱՄՆ-ի և Մեքսիկայի սահմանի մասին չէ, և հայտարարեց, որ գազամուղի բացումը ճակատագրական նշանակություն ունի Հայաստանի համար։ 2007թ. մարտի 19-ին Ռ.Քոչարյանը և ԻԻՀ նախագահ Մահմուդ Ահմադինեժադը պաշտոնապես բացեցին Իրան-Հայաստան գազամուղը։

«Այդպիսին է լինում պետության անկախ քաղաքականությունը, իսկ այն, ինչ կատարվում է այսօր, ընդհանուր ոչինչ չունի դրա հետ»,-ընդգծեց Վարդանյանը, հիշեցնելով, թե ինչպես է վարչապետ Փաշինյանը կաշվից դուրս գալիս, որպեսզի 10 րոպե տևողությամբ ընդունելություն ստանա Պուտինի մոտ, իսկ խորհրդարանի նախագահ Արարատ Միրզոյանը խնդրում է, որ ամերիկացիները չշոշափեն հայ-իրանական հարաբերությունների թեման։

 Վարդանյանը կարծիք արտահայտեց, որ իշխանությունը փորձում է հարցերը լուծել ուժ ցուցադրելու և ժողովրդին վախեցնելու եղանակով, սակայն նման միջոցներով անհնար է երկար ժամանակ մնալ ղեկին, իսկ «Իմ քայլը» խմբակցության պատգամավորի այն հայտարարությունը, թե իրենք իշխանություն կլինեն 40 տարի, Վարդանյանը մեկնաբանեց այսպես. «Թող իրենք դեռ 40 օր մնան»։