Արթուր ՀՈՎՀԱՆՆԻՍՅԱՆ. «ԺԱՄԿԵՏԸ ՄՆՈՒՄ Է ՈՒԺԻ ՄԵՋ, ԻՆՉ ԷԼ ՈՐ ԱՍԻ ՆԱԽԱԳԱՀԸ»
«ԳԱ»-ի զրուցակիցն է փաստաբան, «Կոնցեռն Դիալոգ» ընկերության գործընկեր, արդարադատության նախկին փոխնախարար Արթուր ՀՈՎՀԱՆՆԻՍՅԱՆԸ:
-Պարոն Հովհաննիսյան, երեկ ՀՀ նախագահ Արմեն Սարգսյանը ԱԺ նախագահ Արարատ Միրզոյանին տեղեկացրեց, որ «Սահմանադրական դատարանի մասին» սահմանադրական օրենքում փոփոխություններ և լրացումներ կատարելու մասին օրենքը հարակից օրենքով իր կողմից չեն ստորագրվելու։ Ինչպե՞ս հասկանալ դա։
-ՀՀ Սահմանադրության համաձայն՝ ցանկացած օրենք նախագահը 21 օրվա ընթացքում պետք է կա՛մ ստորագրի, կա՛մ ուղարկի Սահմանադրական դատարան՝ դրա սահմանադրականությունը որոշելու համար։ Եթե նախագահը չկատարի այդ գործողություններից ոչ մեկը, ապա արդեն 22-րդ օրը ստորագրելու իրավունքն անցնում է Ազգային ժողովի նախագահին։ Ընդգծում եմ, 22-րդ օրը, դրանից ոչ շուտ։
Ենթադրենք, թե նախագահը կանխավ հայտարարում է, որ չի ստորագրելու օրենքը, որ առհասարակ հրաժարվում է այն ստորագրել։ Դա ամենևին չի նշանակում, թե ստորագրության իրավունքն արդեն հիմա անցնում է ԱԺ նախագահին։ Կրկնում եմ, ԱԺ նախագահը դա կարող է անել սահմանված ժամկետից ոչ շուտ, միայն 22-րդ օրը։ Օրենքը գրված է և գործում է այդ կերպ, անկախ նրանից, թե ինչ կասի նախագահը։
-Ընդ որում նախագահը կարող է և մտափոխվել, այնպես չէ՞…
-Կարող է, թեև հարցը նույնիսկ դա չէ: Ստորագրության լիազորությունները ԱԺ նախագահին են անցնում միայն և միայն Սահմանադրությամբ սահմանված 21-օրյա ժամկետից հետո: Բացի այդ, չի բացառվում, որ այսօր, օրինակ, նախագահը չի ստորագրում, ԱԺ նախագահը շտապում է և յուրացնում ստորագրության իրավունքը, իսկ վաղը նախագահը մտափոխվում է և ուղարկում օրենքը Սահմանադրական դատարան։ Ստացվում է, որ խոսնակը գերազանցել է իր պաշտոնեական լիազորությունները, իսկ դա արդեն Քրեական օրենսգրքի հոդված է, որը նախատեսում է քրեական պատիժ։
-Այսինքն քանի դեռ ժամկետը չի լրացել, Սահմանադրական դատարանի շուրջ ոչ մի փոփոխություն չի՞ կարող տեղի ունենալ։ Ամեն ինչ մնում է ինչպես որ կա՞, այդ թվում՝ Ռոբերտ Քոչարյանի հարցով հուլիսի 7-ին նշանակված նիստը։
-Այո, օրենքով ամեն ինչ մնում է այնպես, ինչպես կա։ Նկատեք, Սահմանադրական դատարանի դատավոր Աշոտ Խաչատրյանը, որը տարիքային ավագության սկզբունքով նշանակվել է ՍԴ նախագահի պարտականությունները կատարող, ի պատասխան շնորհավորանքների՝ միանգամից հայտարարեց, որ դրանք վաղաժամ են, և ամեն դեպքում մինչև 21-րդ օրը լրանալը ՍԴ նախագահ է մնում Հրայր Թովմասյանը։
Ինչ վերաբերում է Ռոբերտ Քոչարյանի հարցով դիմումի քննությանը, ապա այստեղ հարցականի տակ է. կհավաքվի՞ արդյոք քվորում՝ հաշվի առնելով Հ.Թովմասյանի և Ա.Պետրոսյանի արձակուրդը։
-Հետաքրքիր է, ինչպե՞ս կպահի իրեն իշխանությունը նախագահի հայտարարությունից հետո…
-Լսել եմ այդ թեմայով «Ազատություն» ռադիոկայանին Ալեն Սիմոնյանի տված հարցազրույցը, որտեղ նա ասաց, որ իրենք դեռ չեն որոշել, թե ինչ են անելու: