ՀԵՐՔՈՒՄ «ՊՈՂՈՍՆԵՐԻ» ՀԱՄԱՐ

Վարչապետի մամլո քարտուղարը հերքեց տեղեկատվությունը Իջևանի քաղաքապետի պաշտոնակատար Հայկ Ղալումյանի դստեր՝ Հայկուհի Ղալումյանի հարսանիքին Փաշինյանի ընտանիքի ներկայության մասին: Մենք բազմիցս գրել ենք Ղալումյանների ընտանիքի հետ Փաշինյանի կապերի մասին։ Իշխանափոխությունից հետո Ղալումյան եղբայրներից մեկը դարձավ պատգամավոր, երկրորդը նշանակվեց քաղաքապետի պաշտոնակատար։ Հարսանիքը տեղի է ունեցել քաղաքապետի պաշտոնակատարի ընտանիքին պատկանող «Ոսկե ձկնիկ» ռեստորանային համալիրում, եղել են մեծ քանակությամբ հյուրեր, ընդ որում բոլորը՝ իշխող նոմենկլատուրայի թվից։

Հարսանյաց հանդիսություններին մասնակցել են «Իմ քայլը» խմբակցության պատգամավորներ, կառավարության անդամներ, ինչպես նաև ոստիկանապետ Վահե Ղազարյանը կնոջ ՝ Լուսինեի հետ: Հիշեցնեմ, որ վերջերս «Գոլոսը» և այլ լրատվամիջոցներ տեղեկացրել էին բնակչությանը, որ Ղազարյանը բազմամարդ ու աղմկոտ խնջույքի է մասնակցել «Ծիրանի» ռեստորանային համալիրում՝ արտակարգ դրության բոլոր նորմերի և կանոնների խախտումով։ Դրա համար ոստիկանապետը ոչ մի պատժի չենթարկվեց, ինչպեսև, ասենք, «Իմ քայլը» խմբակցության պատգամավոր Հայկ Սարգսյանը, որը սկանդալային երեկույթ էր կազմակերպել Սևանի «Սպիտակ Շորժա» լողափի մի հատվածում...

Իջևանում տեղի ունեցած հարսանիքը հերթական օրինակն է, թե ինչ ցինիկաբար է իշխանությունը խախտում խաղի իր իսկ սահմանած կանոնները՝ ցույց տալով, որ իր համար գործում են ուրիշ կանոններ, իսկ «պողոսների» համար՝ միանգամայն այլ։ Առանձնակի ցանկանում եմ ընդգծել պաշտոնական հերքման փաստը՝ տեղի բնակիչների անթիվ-անհամար վկայությունների խորապատկերին, որոնք, չնշելով իրենց անունը, ամեն կերպ փորձում էին տեղեկացնել ԶԼՄ-ներին, որ Փաշինյանի ընտանիքը ողջ կազմով մասնակցել է հարսանեկան խնջույքին, որն անցկացվել է սոցիալական հեռավորության խախտումով, իսկ հյուրերը եղել են առանց դիմակների: Դրանից հետո Փաշինյանն այցելեց Գեղարքունիքի մարզ. նա շրջում էր համայնքներում ու ամեն րոպե կրկնում դիմակներ կրելու և սոցիալական հեռավորություն պահպանելու տեղի բնակիչներին ուղղված կոչը... Աննախադեպ փարիսեցիությո՛ւն:

Իջևանում Նիկոլին չեն սիրում, է՛լ ավելի քիչ են սիրում համայնքի ղեկավարի պաշտոնակատարի տեղում նրա դրածոյին։ Մենք արդեն տեղեկություններ ենք հրապարակել այն մասին, որ այդ համայնքում ղեկավարի ընտրություններ չեն անցկացվում իշխանությունների այն մտավախության պատճառով, որ ընտրողները միահամուռ դեմ կքվեարկեն Ղալումյանին։ Ղալումյանների ընտանիքի հետ Նիկոլի մտերմությունն այնքան մեծ է, որ նրա բացակայության դեպքում հարսանիքը չէր կայանա ընդհանրապես, բայց «պողոսները» հենց դրա համար էլ «պողոսներ» են, որ նրանց խաբեն ցանկացած առիթով։ Ի դեպ, շատ շուտով Նիկոլն ընտանիքի հետ կայցելի ևս մեկ հարսանիք։

Այն բանից հետո, երբ «Իմ քայլը» խմբակցության պատգամավոր Սասուն Միքայելյանը համառորեն փորձում էր համոզել փոխվարչապետ, պարետ Տիգրան Ավինյանին՝ ավելացնել զանգվածային միջոցառումների մասնակիցների թիվը 40-ից 60-ի, պարզ դարձավ, որ պատգամավորը ջանում է իր համար։ Բանն այն է, որ անցած տարի տեղի է ունեցել Միքայելյանի դստեր նշանադրությունն իր մարտական ընկերոջ որդու՝ Կոտայքի մարզպետի տեղակալ Վասակ Վարդանյանի հետ։

Հարսանիքը նախատեսվում էր անցկացնել սեպտեմբերին, իսկ Նիկոլի և Սասունի ընկերությունն այնքան ջերմ է, որ Փաշինյանների ընտանիքի բացակայության դեպքում հարսանիքը պարզապես չի կայանա։ Այն հանգամանքը, որ Միքայելյանին չհաջողվեց 60 հոգու թույլտվություն «պոկել», ամենևին չի նշանակում, թե հարսանիքի հյուրերը սակավաթիվ են լինելու։ Հարսանիքը կնշեն մեծ շուքով, և հրավիրյալներն էլ շատ կլինեն, այդ թվում՝ վարչապետի ընտանիքը ողջ կազմով։ Իսկ ինչո՞ւ ոչ։ Հարկ եղած դեպքում մամուլի խոսնակը կհերքի Նիկոլի մասնակցության փաստը, իսկ «պողոսները» կհավատան…