ՎԱԳՈՆ-ՏՆԱԿԻ ՏԽՈՒՐ ՊԱՅՄԱՆՆԵՐԻՑ ԿԱԶԱՏՎԻ ԵՎՍ ՄԵԿ ԸՆՏԱՆԻՔ

Լավ կյանքի հույսն ու հեռանկարը, տարիներ առաջ, Կարապետյանների ընտանիքին երկրի սահմաններից դուրս էին հանել: Օտարության մեջ, սակայն, նախատեսված ծրագրերն ու կյանքի հունն այլ ընթացք են ստացել: Բազմաթիվ՝ առողջական ու ֆինանսական խնդիրներ հաղթահարելուց հետո, Կարապետյաններն ստիպված են եղել վերադառնալ Հայաստան: Անտուն մնացած ընտանիքը մի փոքրիկ հողակտոր է գնել ու ապրել վագոն-տնակում: Արարատի մարզի Դվին գյուղում տեղադրված երկաթյա կացարանը, 8 տարի Կարապետյաններին ծառայելուց հետո, քայքայվել է:

«Վագոն-տնակը մետաղական է եվ քայքայվել է: Ներսում վաղուց կաթում էր, առաստաղն էլ շարքից դուրս էր եկել: Փորձեցինք դեմն առնել, նորոգել, բայց ամեն ինչ ժամանակավոր էր: Ստիպված հարմարվել ենք, բայց այլևս հնարավոր չէ համակերպվել»,-ասել է տանտիրուհին՝ Մելսիդա Կարապետյանը:

Որդու՝ Մարտիկի ընտանիքին օգնելու նպատակով, 91-ամյա հայրը՝ Սոտնիկը, շինարարություն է նախաձեռնել՝ ներդնելով տարիներ շարունակ հավաքած խնայողությունը՝ կենսաթոշակը: Ավելին չկարողանալով՝ Սոտնիկը որդուն ուղղորդել է դիմել հանրապետության բոլոր մարզերում տնաշինական ծրագիր իրականացնող գործընկեր կազմակերպություններին՝ Վիվա-ՄՏՍ-ի ու «Հայաստանի Ֆուլեր տնաշինական կենտրոնին»: Ծրագրում ընդգրկված՝ Կարապետյանների ընտանիքը շինարարությունն սկսել է իրականացնել համավարակի պայմաններում:

«Ինչ կազմակերպել և արել եմ՝ իմ շնորհքն է: Թոշակս հավաքել եմ՝ իմ ձեռքով երեխաներիս օգնելու համար: Արել եմ, որ իմ մահից հետո ոչ ոք դրսում չմնա: 91 տարեկան եմ, աշխատել եմ մինչև 88 տարեկան: Ես ինձ պահում եմ՝ երեխաներիս էլ՝ ինձ հետ: Շինարարությանը չեն թողնում մասնակցեմ՝ ասելով, որ ես իմ գործն արդեն արել եմ»,-ասել է Սոտնիկ Կարապետյանը:

Արդեն մի քանի ամիս ընթացող շինարարությունը փոխել է ընտանիքի անդամների տրամադրությունն ու վաղվա օրվա նկատմամբ հավատը: Աշխատում են օր առաջ ավարտին հասցնել այն, ինչը չի հաջողվել նախկինում: 91-ամյա պապն էլ անհամբեր սպասում է նոր տան բացման արարողությանը: Հույս ունի, որ որդու ընտանիքը Նոր տարին կնշի քարե տանը, իսկ ինքը, սեղանի պատվավոր հատվածում նստած՝ կընդունի իրենց աջակցող կազմակերպությունների՝ Վիվա-ՄՏՍ-ի և «Հայաստանի Ֆուլեր տնաշինական կենտրոնի» ներկայացուցիչներին:

Սոցիալական պատասխանատվությամբ առաջնորդվող՝ տարիների գործընկերներն ակտիվորեն հետևում են հանրապետության տարբեր մարզերում իրականացվող աշխատանքներին՝ ձգտելով տարեվերջին արձանագրել ծրագրով նախատեսված՝ ցանկալի արդյունքը:

Վիվա-ՄՏՍ-ը (ՄՏՍ Հայաստան ՓԲԸ) Հայաստանի հեռահաղորդակցության առաջատար օպերատորն է, որն ունի ամենաընդարձակ ցանցը և տրամադրում է ձայնային և տվյալների փոխանցման ծառայությունների բազմազան տեսականի` Հայաստանի ամբողջ տարածքում: Գործունեության հիմք ընդունելով իր բաժանորդների շահերին լավագույնս ծառայելը, հիմնադրման օրվանից` 2005թ. հուլիսի 1-ից, Վիվա-ՄՏՍ-ը կարճ ժամանակամիջոցում կարողացել է ստեղծել համահանրապետական ցանց և բաժանորդների մեծ բազա: Վիվա-ՄՏՍ-ը նորարարությունների առաջատարն է և հետամուտ է ոլորտի բոլոր զարգացումներին` ի շահ երկրի շարժական հեռահաղորդակցության շուկայի: Վիվա-ՄՏՍ-ն իր գործունեության մեջ առաջնորդվում է ISO 26000 (Սոցիալական պատասխանատվության միջազգային ստանդարտ) և ISO/IEC 27001:2013 (Տեղեկատվական անվտանգության կառավարման համակարգ) ստանդարտներով: Հավելյալ տեղեկություններ ստանալու համար այցելեք www.mts.am։

«Մոբիլնիյե Տելեսիստեմի» ՀԲԸ-ն (ՄՏՍ) Ռուսաստանում և ԱՊՀ երկրներում հեռահաղորդակցության խոշորագույն օպերատոր է: Դուստր ձեռնարկությունների հետ միասին կազմակերպությունը սպասարկում է ավելի քան 86.8 միլիոն բաժանորդի Ռուսաստանում, Հայաստանում և Բելառուսում: 2000թ-ի հունիսից «ՄՏՍ»-ի բաժնետոմսերը գնանշված են Նյու Յորքի բորսայում MBT ծածկագրի տակ: Հավելյալ տեղեկություններ ստանալու համար այցելեք www.mtsgsm.com: