ԱԺ-ն պետբյուջեի կատարման տարեկան հաշվետվությունն ընդունեց առանց ընդդիմության

ՀՀ Ազգային ժողովն ընդունեց 2025 թ. պետական բյուջեի կատարման տարեկան հաշվետվությունը։

Խորհրդարանական ընդդիմադիր երկու խմբակցությունները չեն մասնակցում նիստին։

Հաշվետվությունն ընդունվեց բացառապես «Քաղաքացիական պայմանագիր» խմբակցության քվեարկությամբ. կողմ քվեարկեց 57 պատգամավոր։

Անցյալ տարի բյուջեի եկամուտները կազմել են 2 տրլն 886.5 մլրդ դրամ, ինչը մոտավորապես 12%-ով շատ է 2024 թվականի ցուցանիշից։ Եկամուտների պլանը գերակատարվել է 12.3%-ով։

Եկամուտների աճ է գրանցվել գրեթե բոլոր հիմնական հարկերի գծով։ ԱԱՀ-ի հավաքագրումները աճել են 21%-ով, շահութահարկը՝ գրեթե 20%-ով, եկամտային և ակցիզային հարկերը՝ մոտ 12%-ով։ Միևնույն ժամանակ մաքսային տուրքերից ստացված եկամուտները նվազել են 1.3%-ով՝ 2025 թվականին ապրանքների միջազգային վերավաճառքի ծավալների նվազման պատճառով։ Փոքր և միջին բիզնեսի շրջանառության հարկի հավաքագրումները աճել են 30%-ով։

Բյուջեի ծախսերը կազմել են 3 տրլն 305 մլրդ դրամ, ինչը մոտ 12%-ով շատ է նախորդ տարվա ցուցանիշից։

Սոցիալական պաշտպանությանն ուղղվել է 873.7 մլրդ դրամ, պաշտպանության համար՝ 678.8 մլրդ դրամ, կրթության համար՝ 319.6 մլրդ դրամ, առողջապահության համար՝ 165.8 մլրդ դրամ։

2024 թվականի համեմատ սոցիալական պաշտպանության ծախսերն աճել են 2.6%-ով, պաշտպանության համար՝ 23.6%-ով, կրթության համար՝ 38.4%-ով, առողջապահության համար՝ 7.1%-ով։

Sputnik Արմենիա