Վախեցած մարդն իր անվտանգությունը չի կարող կառավարել, և նույնը վերաբերում է պետությանը։ Այս մասին ասել է «Ուժեղ Հայաստան» կուսակցության առաջնորդ Սամվել Կարապետյանը Նազենի Հովհաննիսյանի «Կամուրջներ» հաղորդման շրջանակում։ Կարապետյանը շեշտել է, որ ՀՀ անվտանգության հարցում աշխարհաքաղաքական ընտրությունը պետք է բխի բացառապես Հայաստանի շահերից։
Նրա խոսքով՝ Հայաստան-Ռուսաստան հարաբերությունները, եթե չսպասարկեն Հայաստանի շահը, ապա ՀՀ-ն միշտ էլ այլընտրանք ունի։
«Ինձ համար կոնկրետ որոշում է, որ մենք պետք է ապահովենք Հայաստանի զարգացումը, բայց մենք չենք երգելու ուպարելու բոլորի հետ, որ ժողովրդին ցույց տանք, թե կարող ենք բեմի վրա սրա-նրա հետպարել։ Այդ «պարը» կարող է մեծ վնաս տալ մեր ժողովրդին։ Մենք թույլ չենք տա բերել Զելենսկուն, որ Հայաստանից այնպիսի հայտարարություն անի, որը կվնասի մեր երկրին ու ժողովրդին։ Մենք պետք է վարենք ռացիոնալ ու հայրենանվեր քաղաքականություն»,– ասել է նա։
Սամվել Կարապետյանը նաև հիշեցրել է, որ Ինքը Փաշինյանի հրաժարականը պահանջել է 2020 թվականի պարտությունից հետո, բայց չնայած դրան շարունակել է ներդրումներ անել երկրում։
Կարապետյանն անդրադարձել է նաև Հայաստանի գործարար միջավայրին։ Նա պատմեց, որ երբ Ռուսաստանում սկսել է բիզնես ստեղծել, որևէ կապ չի ունեցել երկրի քաղաքական ղեկավարության հետ։ Նրա խոսքով՝ բիզնեսը կառուցվել է զրոյից և շուկայական տրամաբանությամբ։
Կարապետյանն իր խոսքում ընդգծել է՝ չտես մարդուց ավելի ագահ մարդ աշխարհում գոյություն չունի։
«Հիմա ես տեսնում եմ, որ այս մարդիկ այս սկզբունքով առաջ են շարժվում, այս մարդիկ չեն պատկերացնում իրենց կյանքն առանց իշխանության, առանց թալանի։ Դրա համար հունիսի 7-ին մեր ժողովուրդը պետք է կանգնեցնի այս ամենը»,- նշել է նա։
