Եվրահանձնաժողով․ Հայաստանը Եվրամիությանը մոտ է առավել, քան երբևէ

Եվրահանձնաժողովի պաշտոնական ներկայացուցիչ Մարկուս Լամմերտը ճեպազրույցի ընթացքում հայտարարել է, որ Հայաստանը Եվրամիությանը մոտ է առավել, քան երբևէ։

Նրա խոսքով՝ Երևանում կայացած ԵՄ—Հայաստան առաջին գագաթնաժողովը հաջող է անցել։

Նա նաև դրական է գնահատել համագործակցությունը Կայունության և աճի խթանման ծրագրի, Եվրոպական խաղաղության հիմնադրամի և գործընկերային առաքելությունների շրջանակում։

Լամմերտը ընդգծել է, որ Երևանն արդեն կատարել է առաջին քայլը դեպի ԵՄ՝ ընդունելով ԵՄ–ին անդամակցելու գործընթացի մեկնարկի մասին օրինագիծը՝ դա անվանելով կարևոր խորհրդանշական քայլ։

Նա հիշեցրել է, որ ԵՄ անդամակցությունը ենթադրում է հստակ գործընթաց և պահանջում է թեկնածու երկրի պաշտոնական դիմումը։ «Մենք արդեն աշխատում ենք Հայաստանի՝ ԵՄ-ի հետ մերձեցման ուղղությամբ՝ տրանսպորտային և էներգետիկ կապերի, առևտրի և այլ ոլորտների միջոցով», — նշել է Լամմերտը։

Եվրահանձնաժողովի գլխավոր մամուլի քարտուղար Պաուլա Պինյոն, իր հերթին, հայտարարել է, որ ԵՄ-ն «մեծ հետաքրքրությամբ հետևում է Հայաստանում ընթացող գործընթացներին»։

Նա հավաստիացրել է, որ Եվրահանձնաժողովի նախագահ Ուրսուլա ֆոն դեր Լայենը աջակցում է Հայաստանի քաղաքացիների դիրքորոշմանը Եվրամիության վերաբերյալ։

Հիշեցնենք, որ երեկ Հայաստանի վարչապետ Նիկոլ Փաշինյանը հայտարարել էր, որ Երևանը մտադիր է մոտ ժամանակում ԵՄ անդամակցության հայտ ներկայացնել։

News.am