Վերնագրում տեղ գտած հարցի պատասխանը, ենթադրաբար, կտա Գյումրիի ավագանու հուլիսի 15-ին նշանակված արտահերթ նիստը: Բանն այն է, որ անազատության մեջ գտնվող Վարդան Ղուկասյանի փեսան՝ Ավետիս Առաքելյանը, որը կատարում է ավագանու նախագահի գործառույթները, 9-րդ գումարման խորհրդարան է անցել «Ուժեղ Հայաստան» դաշինքի ցուցակով (թիվ 6): Բացառված չէ, որ դեռ նիստից առաջ հանգուցալուծվի ինտրիգը. կգնա արդյոք Առաքելյանը խորհրդարան, թե՞ կմնա Գյումրիում՝ շարունակելու պայքարը:
ԱՐՏԱՀԵՐԹ ՆԻՍՏԻՑ ՀԵՏՈ ԱՎԱԳԱՆԻՆ ԱՐՁԱԿՈՒՐԴ ԿԳՆԱ ՄԻՆՉԵՎ ՍԵՊՏԵՄԲԵՐԻ ՎԵՐՋ, իսկ եթե Առաքելյանը մնա պաշտոնում, ապա նրա առաջին տեղակալ, ըստ լուրերի, կդառնա Մարտուն Գրիգորյանի թիմակիցը, ինչը նշանակում է, որ Գյումրիի ավագանիում ընդդիմությունը չի նահանջի և քաղաքը չի հանձնի ՔՊ-ին…
Հունիսի 7-ի ընտրություններում ՔՊ-ի կեղծ հաղթանակի տաք հետքերով Գյումրիում արտահերթ ընտրություններ նախաձեռնելու Փաշինյանի խոստումը վտանգի տակ է։ Դրա պատճառը ընդդիմադիր ուժերի միասնությունն է, որոնք մեծամասնություն են ապահովել 2025 թվականի մարտի 30-ի ընտրությունների արդյունքներով։ Մեխանիզմը հետևյալն է. ավագանու անդամները՝ Գրիգորյանի գլխավորած կոմունիստների կուսակցությունից և «Մեր քաղաքը» դաշինքից, զգալուն պես, որ կալանավորման վտանգի տակ են, անմիջապես հրաժարվում են մանդատից, և նրանց փոխարինելու է գալիս այլ ավագանի նախընտրական ցուցակից: Դա թույլ է տալիս խուսափել ավագանու աշխատանքի ճգնաժամից։
Այն մասին, որ չափերով և բնակչության թվով երկրորդ քաղաքում ՔՊ-ի հակառակորդները ամուր հաստատվել են իշխանության ղեկին, վկայում է Սարիկ Մինասյանի փախուստը: Համայնքի ավագանու ընտրություններում ՔՊ թեկնածուն հրաժարվեց ոչ միայն Գյումրիի ավագանու ՔՊ խմբակցության ղեկավարի, այլև «Հայաստանի էլեկտրական ցանցեր»-ի Շիրակի մասնաճյուղի տնօրենի պաշտոնից: Ուղիղ մեկ տարի առաջ, երբ ռեժիմը Սամվել Կարապետյանից խլեց ՀԷՑ-ը, կառավարչի ժամանակավոր պաշտոնակատար Ռոմանոս Պետրոսյանը նշանակեց Մինասյանին մարզային մասնաճյուղի տնօրեն: Այդ նշանակումը տեղի ունեցավ, իհարկե, Փաշինյանի հրահանգով։ Սարիկը պիտի ՔՊ-ի համար ձայներ ապահովեր հունիսի 7-ի խորհրդարանական ընտրություններում։ Հիմա Մինասյանը որոշել է ճողոպրել Գյումրիից, որտեղ նրան վերաբերվում են, մեղմ ասած, առանց մեծ համակրանքի, և վերցնել պատգամավորական մանդատը:
Օրերս ՔՊ վարչությունն ընդառաջեց Սարիկի ցանկություններին, սակայն բնավ փաստ չէ, թե նրան թույլ կտան երկար վայելել պատգամավորական կուշտ կյանքը։ Եթե Փաշինյանին հաջողվի հասցնել իրավիճակն արտահերթ ընտրությունների, ապա Սարիկին կարող են նորից գցել հրակնատի վրա՝ նշանակելով ՔՊ նախընտրական ցուցակի թիվ 1 թեկնածու։ Այդ դեպքում նա ստիպված կլինի հրաժարվել պատգամավորական մանդատից, եթե, իհարկե, ՔՊ-ի տեղական ստորաբաժանումում ավելի հարմար թեկնածու չգտնվի։ Հիշեցնեմ, ի դեպ, որ 2025-ի ընտրություններում Մինասյանի թեկնածությանն աջակցել են ՔՊ համայնքային և մարզային ստորաբաժանումների ոչ բոլոր անդամները։ ԶԼՄ-ներ նույնիսկ լուրեր էին թափանցել, որ այդ ստորաբաժանումների որոշ անդամներ սաբոտաժի են ենթարկել ավագանու ընտրությունները, որոնք Սարիկը շռնդալից տանուլ տվեց։
Գյումրու ավագանու արտահերթ ընտրություններ նախաձեռնելու ռեժիմի փորձերին դիմադրությունը շարունակվում է, հյուսիսային մայրաքաղաքում նույնիսկ կոմունիստներն են պայքարում ռեժիմի դեմ: Տեսնենք, ինչքա՞ն կդիմանան նրանք: Գրիգորյանի դաշինքի համար կարելի է չանհանգստանալ, նրանք չեն ընկրկի։ Դե, իսկ առաջիկա ամիսներին վերջնականապես պարզ կդառնա՝ գործարքի կգնան արդյոք ընդդիմադիր ուժերը, թե՞ ռեժիմի ճնշման տակ չեն երերա և կշարունակեն պայքարը։
