Սերժ Սարգսյան․ Ո՞ր զենքն է ավելի ժամանակակից և հզոր՝ «շքերթում» ցուցադրվա՞ծը, թե՞ «Իսկանդերը» (ՏԵՍԱՆՅՈՒԹ)

Հայաստանի երրորդ նախագահ Սերժ Սարգսյանը թերահավատորեն է վերաբերվում վերջերս անցկացված շքերթում իշխանությունների ցուցադրած սպառազինությանը։

Քվեարկությունից հետո լրագրողների հետ զրույցում նախկին նախագահին խնդրել են մեկնաբանել վարչապետ Փաշինյանի բացասական գնահատականը այն սպառազինության վերաբերյալ, որով նախկինում հագեցած էր բանակը։

«Լսե՞լ եք նրա խոսքերը 2020 թվականին՝ պատերազմից առաջ, որ հայկական բանակը տարածաշրջանում վճռորոշ նշանակություն ունի։ Եթե զենքը «մետաղաջարդոն» էր, ապա ինչպե՞ս էր այն «վճռորոշ ուժ»։ Երկրորդ՝ զենքը ցուցադրելու համար չէ, այլ՝ կռվելու։ Նրանք, ովքեր շատ են խոսում, այս զենքով քանի՞ մարտ են անցկացրել։ Զրո։ Այն, ինչ ցույց տվեցին, ձեզանից ո՞վ կարող է ասել, թե որքան են գնել։ Դա էլ չեք կարող ասել։ Կամ ո՞ր զենքն է ավելի ժամանակակից և հզոր՝ ցուցադրվա՞ծը, թե՞ «Իսկանդերը»։ Ակնհայտ է, որ սա ոչ թե շքերթ է, այլ ցուցադրություն՝ արդարացնելու այն հսկայական թվերը, որոնք իբր հատկացվել են Պաշտպանության նախարարությանը»,- հայտարարել է Սարգսյանը՝ հավելելով, որ ամեն ինչ կպարզվի իշխանափոխությունից հետո, երբ հնարավորություն լինի հետաքննելու ամեն ինչ։

News.am