«Ոսկու աշխարհ» տոնավաճառի սեփականատեր Վաղարշ Աբրահամյանին (առավել հայտնի է որպես «Ոսկու շուկայի Վաղարշ») պատկանող «Վաղարշ և որդիներ կոնցեռն» ՍՊԸ–ն վարչական դատարան է դիմել ընդդեմ ՀՀ կրթության, գիտության, մշակույթի և սպորտի նախարարության։ Այս մասին տեղեկացնում է «Ժողովուրդ» օրաթերթը։
Պարբերականը գրում է, որ դատական վեճը կապված է «Գողություն հայկական ձևով» ֆիլմի արտադրության հետ։ «Վաղարշ և որդիներ կոնցեռն» ՍՊԸ–ն հայցով պահանջում է ընդունել իր համար բարենպաստ վարչական ակտ և տրամադրել օրենքով նախատեսված պետական աջակցությունը։
«Ընկերությունը դատարանից պահանջում է պարտավորեցնել ԿԳՄՍ նախարարությանը՝ 2026 թ. ապրիլի 21–ին ներկայացված հայտի հիման վրա ընդունել վարչական ակտ, որով «Վաղարշ և որդիներ կոնցեռն» ՍՊԸ–ին կտրամադրվի «Գողություն հայկական ձևով» ֆիլմի արտադրության նպատակով կատարված և փաստացի ներդրված դրամական ծախսերի 25 տոկոսի չափով փոխհատուցում»,– նշված է հրապարակման մեջ։
Թերթը պարզել է, որ ընկերությունը զգալի ներդրումներ է արել ֆիլմի արտադրության համար և այժմ պահանջում է, որ նախարարությունը վերադարձնի այդ ծախսերի օրենքով նախատեսված 25 տոկոսը։
Ըստ ներկայացված հաշվարկների՝ պահանջվող գումարը կազմում է շուրջ 200 հազար դոլար։
Sputnik Արմենիա
