ՀՀ վարչապետ Նիկոլ Փաշինյանը ԵԱՏՄ-ի և ԵՄ-ի միջև վերջնական ընտրության հանրաքվե չի անցկացնում, քանի որ քվեարկության ցանկացած ադյունք վատ կլինի նրա համար: «Ռոսիա սեգոդնյա» միջազգային մուլտիմեդիոն մամուլի կենտրոնում «Հայաստանում խորհրդարանական ընտրությունների նախնական արդյունքները» թեմայով կլոր սեղանի ժամանակ նման կարծիք է հայտնել տվյալների մտավոր վերլուծության լաբորատորիայի տնօրեն, «Միջազգային հետազոտությունների գործիքային մեթոդներ» ծրագրի ղեկավար, ՌԴ ԱԳՆ Մոսկվայի միջազգային հարաբերությունների պետական համալսարանի միջազգային հետազոտությունների ինստիտուտի առաջատար գիտաշխատող Նիկոլայ Սիլաևը:
Ավելի վաղ ՀՀ անվտանգության խորհրդի քարտուղար Արմեն Գրիգորյանը Երևանի ընտրատեղամասերից մեկում քվեարկությունից հետո լրագրողներին հայտնել էր, որ օրակարգում չկա Եվրոպական կամ Եվրասիական միությանն անդամակցելու համար հանրաքվե կազմակերպելու հարց: ՀՀ վարչապետ Նիկոլ Փաշինյանն էլ խորհրդարանական ընտրությունների օրը ընդգծել էր, որ Հայաստանը շարունակելու է հավասարակշռված արտաքին քաղաքականություն վարել Ռուսաստանի և ԵՄ-ի հետ հարաբերություններում:
«Եթե ժողովուրդը քվեարկի ԵԱՏՄ-ում մնալու օգտին, Փաշինյանը պետք է հրաժարական տա, քանի որ նա Հայաստանը հանում է այդ կառույցից։ Իսկ եթե ժողովուրդը քվեարկելու է ԵՄ-ին անդամակցելու օգտին, նշանակում է, որ պետք է դուրս գալ ԵԱՏՄ-ից, հրաժարվել բոլոր տնտեսական օգուտներից, իսկ մեկ ամիս անց կամ հաջորդ ընտրություններում երաշխավորված կորցնել իշխանությունը», – ասել է Սիլաևը՝ մեկնաբանելով հանրաքվե անցկացնելը մերժելու՝ ՀՀ վարչապետի որոշումը։
Նրա խոսքով՝ ամեն ինչ շատ պարզ է՝ կա՛մ մասնակցում ես ինտեգրացիոն միավորմանը, կա՛մ էլ չես մասնակում։
Ավելի վաղ Կրեմլում հայտարարել էին, որ Եվրամիության հետ ինտեգրվելու Երևանի ձգտումը նրա ինքնիշխան իրավունքն է, սակայն Հայաստանը չի կարող և չպետք է դա անի ԵԱՏՄ երկրների ֆինանսների հաշվին:
Sputnik Արմենիա
