Երևանն ազատ է լքել ՀԱՊԿ-ը, եթե իր ազգային շահերից ելնելով՝ այլևս անդամակցության կարիք չունի անվտանգության ապահովման համար կարևոր այդ կազմակերպությունում։ Zvezdanews-ի հարցին ի պատասխան այսպիսի հայտարարություն է արել ՌԴ նախագահի մամուլի քարտուղար Դմիտրի Պեսկովը։
Ինչ վերաբերում է ԵՄ-ին անդամակցելու հայտին, Կրեմլի ներկայացուցիչը խորհուրդ է տվել հիշել Թուրքիայի և մի շարք այլ երկրների փորձը, «որոնց հայտ ներկայացնելու պահից արդեն տասնամյակներ են անցել, իսկ սայլը տեղից դեռ չի շարժվել»։
«Բայց կա մի շատ կարևոր բաղկացուցիչ, որի մասին խոսել են մեր ներկայացուցիչները, այդ թվում՝ մեր պետության ղեկավարը։ Հայտ ներկայացնելուց հետո Հայաստանը պետք է սկսի ամենատարբեր ոլորտներում իր օրենսդրությունը ԵՄ նորմերին համապատասխանեցնելու գործընթացը։ Այդ նորմերը չեն համընկնում այն նորմերի հետ, որոնք ընդունված են մեզ մոտ և ԵԱՏՄ տարածքում։ Եվ այստեղ մենք կբախվենք խորը հակասությունների, որոնք առաջին հերթին վնասելու են հենց Հայաստանին»,- ասել է Պեսկովը։
Փաշինյանը Հայաստանի կառավարության հնգամյա ծրագիրը ներկայացնելիս այսօր հայտարարել էր, որ Հայաստանում ՀԱՊԿ վերադառնալու ծրագրեր չկան, և հավելել, թե գոհ կլինի, եթե կազմակերպությունը որոշի Հայաստանին հեռացնել ՀԱՊԿ կազմից։
Sputnik Արմենիա
