Տիգրանաշեն գյուղի բնակիչների մեծ մասը վերջին ընտրություններում քվեարկել է իշխող «Քաղաքացիական պայմանագիր» կուսակցության օգտին, սակայն, չնայած դրան, «Ուժեղ Հայաստան» կուսակցությունը պաշտպանելու է իրենց տներում ապրելու նրանց իրավունքը: Այս մասին Ազգային ժողովում հայտարարեց «Ուժեղ Հայաստան» խմբակցության ղեկավար Նարեկ Կարապետյանը՝ դիմելով խորհրդարանում կառավարության 2026-31թթ. ծրագիրը ներկայացնող վարչապետ Նիկոլ Փաշինյանին:
«Սիրելի՛ տիգրանաշենցիներ, եթե դուք քվեարկեիք «Ուժեղ Հայաստան» կուսակցության օգտին, հիմա ստիպված չէիք լինի քննարկել ձեր տների հարցը։ Բայց միևնույն է, մենք պայքարելու ենք, որ ձեր տները չանցնեն Ադրբեջանին, իսկ դուք օգնեք մեզ պաշտպանել ձեր ունեցվածքը», – հայտարարեց Կարապետյանը։
Կարապետյանը նաև վարչապետից պահանջեց պատասխանել, թե երբ հողերի վերադարձը կսկսի նաև ադրբեջանական կողմը՝ Պառավաքարում, Գորիսում և Ջերմուկում, որովհետև, ինչպես ասաց նա, վերջին երկու տարիներին սահմանազատման շրջանակներում միայն Հայաստանն է հող տվել (չնչին բացառություններով):
Ի պատասխան Փաշինյանը հայտարարեց, որ Կարապետյանն այդ խոսքերով ապացուցում է, որ իր կուսակցությունը պատերազմի կուսակցություն է, քանի որ պատրաստ է պատերազմ սկսել:
«Չի կարելի մի դեպքում առաջնորդվել մի տրամաբանությամբ, մյուս դեպքում՝ մեկ այլ։ Եթե մենք ասենք՝ «ինչ ուժով վերցրինք՝ մերն է», ապա բոլորը կսկսեն նույն կերպ խոսել և կփորձեն շարունակ վերցնել», – հայտարարեց Փաշինյանը՝ հավելելով, որ «Ուժեղ Հայաստանի» դիրքորոշումը նպաստում է դրան։
Օրերս Փաշինյանը խոսել էր Արարատի մարզի Տիգրանաշեն հայկական գյուղի մասին։ Նա հայտարարել է, որ ադրբեջանական կողմի հետ դեռևս մանրամասն չեն քննարկվել անկլավների և էքսկլավների հարցերը, սակայն դրանք պետք է լուծվեն խաղաղության, այլ ոչ թե հակամարտության տրամաբանությամբ, ինչը նշանակում է, որ պետք է գործել երկու հանրապետությունների բնակիչների շահերից ելնելով՝ նրանց համար լրացուցիչ բարդություններ չստեղծելով: Ընդ որում, նա հայտարարել է, որ Երևանի և Բաքվի կողմից համաձայնեցված սահմանազատման սկզբունքի համաձայն՝ Արծվաշենը Հայաստանի տարածքն է, մինչդեռ Քյարքին (Տիգրանաշեն), Բարխուդարլուն և Յուխարի Ասկիպարան՝ ոչ: Ընդ որում, 2022 թվականին Փաշինյանը հայտարարում էր անկլավների հարցում իրավական հիմքերի բացակայության մասին։
Նախկին վարչապետ և Ազգային ժողովի նախկին խոսնակ Խոսրով Հարությունյանը Sputnik Արմենիայի հետ զրույցում ասել է, որ Տիգրանաշենի հանձնումն Ադրբեջանին լուրջ ռիսկեր կստեղծի Հայաստանի հարավային շրջանների հետ տրանսպորտային հաղորդակցության տեսակետից և կարող է երկարաժամկետ հետևանքներ ունենալ երկրի անվտանգության համար։
Sputnik Արմենիա
